1422. September 20. Zindowicz

In Gotis namen Amen. Wir Bernhard von Gotis gnoden herczug zu Oppul vnd zu Falkenberg vnd herre zu Strelicz etc. Bekennen vffinthlichin mit desem briffe allen die en sehen addir hören lesen, das wir angesehen haben getrawen dinst den vns der Erbir Hannus von Dobrodzen vnser Rzwndcze manchfeldiclichin geton hat vnd in czukumpftigen czeiten das do willigir thuen wirt, vnd haben em seinen Elichen geerben nochkomen vnd nehstin gegeben vnd geben in craft desis brieffis vnser gut Jezowa genant in vnserm Löblinschim gebitte gelegin, Mit allen vnd iczlichin czugehörungen genissen vnd fürstenlichin obirsten rechten, mit gebawirn Czinsen ackern gearn vnd vngearn, mit graze vnd grazewachs, mit heiden welden posschen Rutecht vnd gestrutecht, vnd mit allen vnd iczlichin andern czugehörungin vnd genissen, wie die mit eren sundirlichin namen genant sint vnd genant mochten wer den, clein vnd gros, vil vnd wenig, gleich ap iczlichis mit seinem namen hye sundirlichin benant vnd beschreben stunde, als dasselbe gut in seinen greniczen vnd enden ausgesacczit ist vmbefangin vnd gelegin, vnd in allirmose vnd mit dem Rechten als wir is selbir gehabit haben vnd gehalden keinis ausgenomen, Mit dem selbin gutte vnd seinen czugehorungin zuthuen vnd zulosen, zu vorkewffin vnd zu vorsecczin vnd an seinen vnd seiner elichen geerbin nucz vnd fromen zuwenden das bestin her wirt mögin vnd können, Erplichin vnd ewiclichin zu besicczin von vns, vnsern nochkomen herczugen vngehindirt, ydach vnserm furstenlichim dinste vnschedlichin, desselbin dinstes wir den genantin Hannussen frey vnd ledig losen zu seinen lebetagin, Sundir noch seinem tode sullen vns seine nochkomen dienen von dem geschreben gute vff einem pferde von dreen markken, gleich andern vnsern lanthlewtin. Mit vrkunde desis brieffis Bestetigit, Ingeweisit vnd vorsegilt mit vnserm furstenlichim angehangendem Ingesegil. Gegeben zu Zindowicz am Suntage noch des heiligin creucis tag als is dirhabin wart, noch Cristi geburt fierczehnhundirt Jor dornoch in dem czwe vnd czwenczigstim jore, Dobey gewest sint vnser liebin Getrawin Vlbrecht Vschilnick von der Elgot, Janke von Dronowicz, Miczke Strol von Kochczicz, Andreasch von Borgene, Lorencz Tenichin foyt zu Crappicz, Miclasch vom Halbendorffe, vnd Otte Bess von Rogaw, Vnserem Schreiber befulen wir desen briff zu schreiben.

Siegel in dunklem Wachs, an blauen und grünen Seidenfäden.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 1, Urkunden des Klosters Czarnowanz. Hrsg von dr W. Wattenbach, Breslau 1857.